Jonah · Clementine Vulgate

Jonah 3: Nineveh Repents

Jonah preaches in Nineveh; the king and people fast in sackcloth, and God spares the city.

1Et factum est verbum Domini ad Jonam secundo, dicens: 2Surge, et vade in Niniven, civitatem magnam, et prædica in ea prædicationem quam ego loquor ad te.

Jonah and the whale (Jonah 2:10), Pieter Lastman, 1621
Jonah and the whale (Jonah 2:10), Pieter Lastman, 1621

3Et surrexit Jonas, et abiit in Niniven juxta verbum Domini: et Ninive erat civitas magna, itinere trium dierum. 4Et cœpit Jonas introire in civitatem itinere diei unius: et clamavit, et dixit: Adhuc quadraginta dies, et Ninive subvertetur.

Jonah Praying before the Walls of Nineveh, Rembrandt Harmensz. van Rijn, c. 1655
Jonah Praying before the Walls of Nineveh, Rembrandt Harmensz. van Rijn, c. 1655

5Et crediderunt viri Ninivitæ in Deum, et prædicaverunt jejunium, et vestiti sunt saccis, a majore usque ad minorem. 6Et pervenit verbum ad regem Ninive: et surrexit de solio suo, et abjecit vestimentum suum a se, et indutus est sacco, et sedit in cinere. 7Et clamavit, et dixit in Ninive ex ore regis et principum ejus, dicens: Homines, et jumenta, et boves, et pecora non gustent quidquam: nec pascantur, et aquam non bibant. 8Et operiantur saccis homines et jumenta, et clament ad Dominum in fortitudine: et convertatur vir a via sua mala, et ab iniquitate quæ est in manibus eorum. 9Quis scit si convertatur et ignoscat Deus, et revertatur a furore iræ suæ, et non peribimus? 10Et vidit Deus opera eorum, quia conversi sunt de via sua mala: et misertus est Deus super malitiam quam locutus fuerat ut faceret eis, et non fecit.