Mark · Clementine Vulgate

Mark 16: The Resurrection

Women find the tomb empty and hear Jesus is risen; he appears, sends out his disciples, and ascends.

1Et cum transisset sabbatum, Maria Magdalene, et Maria Jacobi, et Salome emerunt aromata ut venientes ungerent Jesum.

The Three Marys at the Tomb, Hubert van Eyck, c. 1425
The Three Marys at the Tomb, Hubert van Eyck, c. 1425

2Et valde mane una sabbatorum, veniunt ad monumentum, orto jam sole. 3Et dicebant ad invicem: Quis revolvet nobis lapidem ab ostio monumenti? 4Et respicientes viderunt revolutum lapidem. Erat quippe magnus valde.

Mary Magdalene and the Holy Women at the Tomb, James Tissot, 1886–1894
Mary Magdalene and the Holy Women at the Tomb, James Tissot, 1886–1894

5Et introëuntes in monumentum viderunt juvenem sedentem in dextris, coopertum stola candida, et obstupuerunt. 6Qui dicit illis: Nolite expavescere: Jesum quæritis Nazarenum, crucifixum: surrexit, non est hic, ecce locus ubi posuerunt eum.

The Resurrection, El Greco, 1597-1600
The Resurrection, El Greco, 1597-1600

7Sed ite, dicite discipulis ejus, et Petro, quia præcedit vos in Galilæam: ibi eum videbitis, sicut dixit vobis.

Holy Women at Christ' s Tomb, Annibale Carracci, 1590s
Holy Women at Christ' s Tomb, Annibale Carracci, 1590s

8At illæ exeuntes, fugerunt de monumento: invaserat enim eas tremor et pavor: et nemini quidquam dixerunt: timebant enim.

Two Disciples at the Tomb, Henry Ossawa Tanner, 1900s
Two Disciples at the Tomb, Henry Ossawa Tanner, 1900s

9Surgens autem mane prima sabbati, apparuit primo Mariæ Magdalene, de qua ejecerat septem dæmonia. 10Illa vadens nuntiavit his, qui cum eo fuerant, lugentibus et flentibus. 11Et illi audientes quia viveret, et visus esset ab ea, non crediderunt. 12Post hæc autem duobus ex his ambulantibus ostensus est in alia effigie, euntibus in villam: 13et illi euntes nuntiaverunt ceteris: nec illis crediderunt.

Kitchen scene with Christ at Emmaus, Joachim Beuckelaer, 1560s
Kitchen scene with Christ at Emmaus, Joachim Beuckelaer, 1560s

14Novissime recumbentibus illis undecim apparuit: et exprobravit incredulitatem eorum et duritiam cordis: quia iis, qui viderant eum resurrexisse, non crediderunt. 15Et dixit eis: Euntes in mundum universum prædicate Evangelium omni creaturæ. 16Qui crediderit, et baptizatus fuerit, salvus erit: qui vero non crediderit, condemnabitur. 17Signa autem eos qui crediderint, hæc sequentur: in nomine meo dæmonia ejicient: linguis loquentur novis: 18serpentes tollent: et si mortiferum quid biberint, non eis nocebit: super ægros manus imponent, et bene habebunt. 19Et Dominus quidem Jesus postquam locutus est eis, assumptus est in cælum, et sedet a dextris Dei.

The Ascension, Luca della Robbia, 1442-45
The Ascension, Luca della Robbia, 1442-45

20Illi autem profecti prædicaverunt ubique, Domino cooperante, et sermonem confirmante, sequentibus signis.

The Ascension with Christ Giving the Keys to Saint Peter, Donatello, c. 1420s
The Ascension with Christ Giving the Keys to Saint Peter, Donatello, c. 1420s