Matthew · Clementine Vulgate

Matthew 27: The Crucifixion

Jesus is handed to Pilate, mocked by soldiers, crucified and buried, and guards are posted at the tomb.

Listen: St John Passion, Johann Sebastian Bach

Listen: St Matthew Passion, Johann Sebastian Bach

1Mane autem facto, consilium inierunt omnes principes sacerdotum et seniores populi adversus Jesum, ut eum morti traderent.

The Morning Judgment, James Tissot, 1886–1894
The Morning Judgment, James Tissot, 1886–1894

2Et vinctum adduxerunt eum, et tradiderunt Pontio Pilato præsidi. 3Tunc videns Judas, qui eum tradidit, quod damnatus esset, pœnitentia ductus, retulit triginta argenteos principibus sacerdotum, et senioribus,

Judas Returns the Silver Coins, Rembrandt Harmensz. van Rijn, 1629
Judas Returns the Silver Coins, Rembrandt Harmensz. van Rijn, 1629

4dicens: Peccavi, tradens sanguinem justum. At illi dixerunt: Quid ad nos? tu videris.

Judas Returns the Money, James Tissot, 1886–1894
Judas Returns the Money, James Tissot, 1886–1894

5Et projectis argenteis in templo, recessit: et abiens laqueo se suspendit.

Judas Hangs Himself, James Tissot, c. 1890
Judas Hangs Himself, James Tissot, c. 1890

6Principes autem sacerdotum, acceptis argenteis, dixerunt: Non licet eos mittere in corbonam: quia pretium sanguinis est. 7Consilio autem inito, emerunt ex illis agrum figuli, in sepulturam peregrinorum. 8Propter hoc vocatus est ager ille, Haceldama, hoc est, Ager sanguinis, usque in hodiernum diem. 9Tunc impletum est quod dictum est per Jeremiam prophetam, dicentem: Et acceperunt triginta argenteos pretium appretiati, quem appretiaverunt a filiis Israël: 10et dederunt eos in agrum figuli, sicut constituit mihi Dominus. 11Jesus autem stetit ante præsidem, et interrogavit eum præses, dicens: Tu es rex Judæorum? Dicit illi Jesus: Tu dicis.

Christ before Pilate (Maestà), Duccio di Buoninsegna, 1308-11
Christ before Pilate (Maestà), Duccio di Buoninsegna, 1308-11

12Et cum accusaretur a principibus sacerdotum et senioribus, nihil respondit. 13Tunc dicit illi Pilatus: Non audis quanta adversum te dicunt testimonia? 14Et non respondit ei ad ullum verbum, ita ut miraretur præses vehementer.

Christ before Pilate, attribution Master of Bellaert, c. 1480
Christ before Pilate, attribution Master of Bellaert, c. 1480

15Per diem autem solemnem consueverat præses populo dimittere unum vinctum, quem voluissent: 16habebat autem tunc vinctum insignem, qui dicebatur Barrabas. 17Congregatis ergo illis, dixit Pilatus: Quem vultis dimittam vobis: Barabbam, an Jesum, qui dicitur Christus?

Barabbas, James Tissot, 1886–1894
Barabbas, James Tissot, 1886–1894

18Sciebat enim quod per invidiam tradidissent eum. 19Sedente autem illo pro tribunali, misit ad eum uxor ejus, dicens: Nihil tibi, et justo illi: multa enim passa sum hodie per visum propter eum.

The Message of Pilate's Wife, James Tissot, 1886–1894
The Message of Pilate's Wife, James Tissot, 1886–1894

20Principes autem sacerdotum et seniores persuaserunt populis ut peterent Barabbam, Jesum vero perderent. 21Respondens autem præses, ait illis: Quem vultis vobis de duobus dimitti? At illi dixerunt: Barabbam. 22Dicit illis Pilatus: Quid igitur faciam de Jesu, qui dicitur Christus? 23Dicunt omnes: Crucifigatur. Ait illis præses: Quid enim mali fecit? At illi magis clamabant dicentes: Crucifigatur.

Let Him Be Crucified, James Tissot, 1886–1894
Let Him Be Crucified, James Tissot, 1886–1894

24Videns autem Pilatus quia nihil proficeret, sed magis tumultus fieret: accepta aqua, lavit manus coram populo, dicens: Innocens ego sum a sanguine justi hujus: vos videritis.

Pilate washing his hands in innocence, Jan Lievens, 1624-1625
Pilate washing his hands in innocence, Jan Lievens, 1624-1625

25Et respondens universus populus, dixit: Sanguis ejus super nos, et super filios nostros. 26Tunc dimisit illis Barabbam: Jesum autem flagellatum tradidit eis ut crucifigeretur.

Flagellation of Christ, Piero della Francesca, 1459–1460
Flagellation of Christ, Piero della Francesca, 1459–1460

27Tunc milites præsidis suscipientes Jesum in prætorium, congregaverunt ad eum universam cohortem:

The Scourging of Christ, Aert Mijtens, c. 2 millennium
The Scourging of Christ, Aert Mijtens, c. 2 millennium

28et exuentes eum, chlamydem coccineam circumdederunt ei, 29et plectentes coronam de spinis, posuerunt super caput ejus, et arundinem in dextera ejus. Et genu flexo ante eum, illudebant ei, dicentes: Ave rex Judæorum.

The Crowning of Thorns, James Tissot, 1886–1894
The Crowning of Thorns, James Tissot, 1886–1894

30Et exspuentes in eum, acceperunt arundinem, et percutiebant caput ejus.

The Crowning with Thorns (1545), Titian, c.1545
The Crowning with Thorns (1545), Titian, c.1545

31Et postquam illuserunt ei, exuerunt eum chlamyde, et induerunt eum vestimentis ejus, et duxerunt eum ut crucifigerent.

Christ Leaving the Praetorium, Gustave Doré, 1876-1883
Christ Leaving the Praetorium, Gustave Doré, 1876-1883

32Exeuntes autem invenerunt hominem Cyrenæum, nomine Simonem: hunc angariaverunt ut tolleret crucem ejus.

Christ Carrying the Cross, El Greco, 1580
Christ Carrying the Cross, El Greco, 1580

33Et venerunt in locum qui dicitur Golgotha, quod est Calvariæ locus.

The Procession Nearing Calvary, James Tissot, 1886–1894
The Procession Nearing Calvary, James Tissot, 1886–1894

34Et dederunt ei vinum bibere cum felle mistum. Et cum gustasset, noluit bibere.

The Vase of Myrrh and Gall, James Tissot, 1886–1894
The Vase of Myrrh and Gall, James Tissot, 1886–1894

35Postquam autem crucifixerunt eum, diviserunt vestimenta ejus, sortem mittentes: ut impleretur quod dictum est per prophetam dicentem: Diviserunt sibi vestimenta mea, et super vestem meam miserunt sortem.

Raising of the Cross (Antwerp), Peter Paul Rubens, 1610
Raising of the Cross (Antwerp), Peter Paul Rubens, 1610

36Et sedentes servabant eum.

The Four Guards Sat Down and Watched Him, James Tissot, 1886–1894
The Four Guards Sat Down and Watched Him, James Tissot, 1886–1894

37Et imposuerunt super caput ejus causam ipsius scriptam: Hic est Jesus rex Judæorum. 38Tunc crucifixi sunt cum eo duo latrones: unus a dextris, et unus a sinistris.

Calvary, Master of the Bruges Passion Scenes, 1500
Calvary, Master of the Bruges Passion Scenes, 1500

39Prætereuntes autem blasphemabant eum moventes capita sua, 40et dicentes: Vah! qui destruis templum Dei, et in triduo illud reædificas: salva temetipsum: si Filius Dei es, descende de cruce. 41Similiter et principes sacerdotum illudentes cum scribis et senioribus dicebant: 42Alios salvos fecit, seipsum non potest salvum facere: si rex Israël est, descendat nunc de cruce, et credimus ei: 43confidit in Deo: liberet nunc, si vult eum: dixit enim: Quia Filius Dei sum. 44Idipsum autem et latrones, qui crucifixi erant cum eo, improperabant ei.

Christ Justifying his Passion, Luis de Morales, c. 1565
Christ Justifying his Passion, Luis de Morales, c. 1565

45A sexta autem hora tenebræ factæ sunt super universam terram usque ad horam nonam. 46Et circa horam nonam clamavit Jesus voce magna, dicens: Eli, Eli, lamma sabacthani? hoc est: Deus meus, Deus meus, ut quid dereliquisti me?

My God, My God, why hast thou forsaken me?, James Tissot, 1886–1894
My God, My God, why hast thou forsaken me?, James Tissot, 1886–1894

47Quidam autem illic stantes, et audientes, dicebant: Eliam vocat iste. 48Et continuo currens unus ex eis, acceptam spongiam implevit aceto, et imposuit arundini, et dabat ei bibere. 49Ceteri vero dicebant: Sine, videamus an veniat Elias liberans eum. 50Jesus autem iterum clamans voce magna, emisit spiritum.

The Three Crosses, Rembrandt Harmensz. van Rijn, 1653
The Three Crosses, Rembrandt Harmensz. van Rijn, 1653

51Et ecce velum templi scissum est in duas partes a summo usque deorsum: et terra mota est, et petræ scissæ sunt,

The Earthquake, James Tissot, 1886–1894
The Earthquake, James Tissot, 1886–1894

52et monumenta aperta sunt: et multa corpora sanctorum, qui dormierant, surrexerunt. 53Et exeuntes de monumentis post resurrectionem ejus, venerunt in sanctam civitatem, et apparuerunt multis.

The Dead Appear in the Temple, James Tissot, 1886–1894
The Dead Appear in the Temple, James Tissot, 1886–1894

54Centurio autem, et qui cum eo erant, custodientes Jesum, viso terræmotu, et his quæ fiebant, timuerunt valde, dicentes: Vere Filius Dei erat iste.

Christ on the Cross between the two criminals, Anthony van Dyck, 1620
Christ on the Cross between the two criminals, Anthony van Dyck, 1620

55Erant autem ibi mulieres multæ a longe, quæ secutæ erant Jesum a Galilæa, ministrantes ei: 56inter quas erat Maria Magdalene, et Maria Jacobi, et Joseph mater, et mater filiorum Zebedæi.

The Holy Women Watch from Afar, James Tissot, 1886–1894
The Holy Women Watch from Afar, James Tissot, 1886–1894

57Cum autem sero factum esset, venit quidam homo dives ab Arimathæa, nomine Joseph, qui et ipse discipulus erat Jesu: 58hic accessit ad Pilatum, et petiit corpus Jesu. Tunc Pilatus jussit reddi corpus.

The Crucifixion, Lucas Cranach the Elder, 1503
The Crucifixion, Lucas Cranach the Elder, 1503

59Et accepto corpore, Joseph involvit illud in sindone munda,

The Lamentation, Giotto, 1304-06
The Lamentation, Giotto, 1304-06

60et posuit illud in monumento suo novo, quod exciderat in petra. Et advolvit saxum magnum ad ostium monumenti, et abiit.

The Entombment, Michelangelo, c. 1510
The Entombment, Michelangelo, c. 1510

61Erant autem ibi Maria Magdalene, et altera Maria, sedentes contra sepulchrum.

The Two Marys Watch the Tomb, James Tissot, 1886–1894
The Two Marys Watch the Tomb, James Tissot, 1886–1894

62Altera autem die, quæ est post Parasceven, convenerunt principes sacerdotum et pharisæi ad Pilatum, 63dicentes: Domine, recordati sumus, quia seductor ille dixit adhuc vivens: Post tres dies resurgam. 64Jube ergo custodiri sepulchrum usque in diem tertium: ne forte veniant discipuli ejus, et furentur eum, et dicant plebi: Surrexit a mortuis: et erit novissimus error pejor priore. 65Ait illis Pilatus: Habetis custodiam, ite, custodite sicut scitis. 66Illi autem abeuntes, munierunt sepulchrum, signantes lapidem, cum custodibus.

The Watch Over the Tomb, James Tissot, 1886–1894
The Watch Over the Tomb, James Tissot, 1886–1894