Matthew · Clementine Vulgate

Matthew 3: The Baptism of Jesus

John the Baptist preaches repentance in the wilderness and baptizes Jesus, and a voice from heaven speaks.

1In diebus autem illis venit Joannes Baptista prædicans in deserto Judææ,

St John the Baptist (1602), Caravaggio, 1602
St John the Baptist (1602), Caravaggio, 1602

2et dicens: Pœnitentiam agite: appropinquavit enim regnum cælorum. 3Hic est enim, qui dictus est per Isaiam prophetam dicentem: Vox clamantis in deserto: Parate viam Domini; rectas facite semitas ejus.

The Voice in the Desert, James Tissot, 1886–1894
The Voice in the Desert, James Tissot, 1886–1894

4Ipse autem Joannes habebat vestimentum de pilis camelorum, et zonam pelliceam circa lumbos suos: esca autem ejus erat locustæ, et mel silvestre. 5Tunc exibat ad eum Jerosolyma, et omnis Judæa, et omnis regio circa Jordanem; 6et baptizabantur ab eo in Jordane, confitentes peccata sua.

Saint John Baptizing in the River Jordan, Nicolas Poussin, c. 1630
Saint John Baptizing in the River Jordan, Nicolas Poussin, c. 1630

7Videns autem multos pharisæorum, et sadducæorum, venientes ad baptismum suum, dixit eis: Progenies viperarum, quis demonstravit vobis fugere a ventura ira?

The Preaching of St. John, Pieter Bruegel the Elder, 1566
The Preaching of St. John, Pieter Bruegel the Elder, 1566

8Facite ergo fructum dignum pœnitentiæ. 9Et ne velitis dicere intra vos: Patrem habemus Abraham. Dico enim vobis quoniam potens est Deus de lapidibus istis suscitare filios Abrahæ.

Saint John the Baptist and the Pharisees, James Tissot, 1886–1894
Saint John the Baptist and the Pharisees, James Tissot, 1886–1894

10Jam enim securis ad radicem arborum posita est. Omnis ergo arbor, quæ non facit fructum bonum, excidetur, et in ignem mittetur.

The Axe in the Trunk of the Tree, James Tissot, 1886–1894
The Axe in the Trunk of the Tree, James Tissot, 1886–1894

11Ego quidem baptizo vos in aqua in pœnitentiam: qui autem post me venturus est, fortior me est, cujus non sum dignus calceamenta portare: ipse vos baptizabit in Spiritu Sancto, et igni. 12Cujus ventilabrum in manu sua: et permundabit aream suam: et congregabit triticum suum in horreum, paleas autem comburet igni inextinguibili.

Tempelhof Altarpiece, Jost Haller, c. 1445
Tempelhof Altarpiece, Jost Haller, c. 1445

13Tunc venit Jesus a Galilæa in Jordanem ad Joannem, ut baptizaretur ab eo.

The Appearance of Christ before the People, Alexander Ivanov, 1837-1857
The Appearance of Christ before the People, Alexander Ivanov, 1837-1857

14Joannes autem prohibebat eum, dicens: Ego a te debeo baptizari, et tu venis ad me? 15Respondens autem Jesus, dixit ei: Sine modo: sic enim decet nos implere omnem justitiam. Tunc dimisit eum. 16Baptizatus autem Jesus, confestim ascendit de aqua, et ecce aperti sunt ei cæli: et vidit Spiritum Dei descendentem sicut columbam, et venientem super se. 17Et ecce vox de cælis dicens: Hic est Filius meus dilectus, in quo mihi complacui.

The Baptism of Christ, Pietro Perugino, c. 1482
The Baptism of Christ, Pietro Perugino, c. 1482